關於呢個平台／私隱

呢版講返點解會有呢個平台、你交低嘅嘢我哋點處理，同埋而家仲有咩做唔到。

點解會有呢個平台

交完之後，就係等。等嘅時候最難受嗰樣，其實唔係耐，係唔知自己算唔算正常。見到有人半年就收到 CPP，自己等咗一年仲係好靜，就會開始諗係咪邊度出咗錯。

其實好多人都好樂意分享自己嘅進度，各個群組每日都有人幫手答，呢點一直都好好。只係傾偈就係傾偈：訊息會一路沉落去，每個人報嘅方式又唔一樣。有人淨係話「CPP咗」，有人報兩三個日期，有人淨係想搵人問下。想砌返一幅完整嘅圖，就要自己一路碌、一路記。

而你自己有咗新進度，通常要再貼多次。所以就算好多人行過同一條路，都好難拼得返一個可以攞嚟參考嘅數字。你記得嘅多數係幾個特別快或者特別慢嘅例子，而嗰啲偏偏最唔代表大多數。

呢個平台想做嘅嘢：

一人一個個案，七個階段用同一套欄位。 大家嘅時間線變成真係可以並排比較嘅嘢，唔使靠人肉拼湊零散嘅留言。
有 Token 就可以更新返同一筆記錄。 由遞交行到 eCOPR 全程都係同一個個案，唔使每次有進展就重新交過。
數字由所有記錄計出嚟。 中位數審批時間、每個階段要等幾耐、幾多人仲排緊隊，唔係靠幾個印象深刻嘅個案推測。
Stream A 同 Stream B 分開計，遞交年份都分開計。 呢兩樣差好遠，撈埋一齊嘅數字對邊個都冇用。
交完之後，你睇到自己喺邊。 同你同月遞交嘅有幾多人、佢哋分別行到邊一步、幾多個已經過咗你下一關。即係話你等緊嗰步，究竟係大家都慢，定係得你特別耐。呢啲要有一定數量嘅記錄先計得出，所以初期可能會見到「未有人」，唔係壞咗，係真係未夠人報。
睇得到成條隊嘅形狀。 邊個階段先係樽頸、最近批出嘅個案幾時遞交、仲有幾多人喺度等。呢啲喺聊天記錄入面係散嘅，砌唔返出嚟。

而家做嘅係 Stream A / B 嘅 PR 進度。之後希望加埋其他途徑同申請嘅進展，例如 OOWP、PGWP、WP-EXT 呢啲工簽同續期。

呢個平台啱啱開始，記錄仲好少。少嘅時候，你嗰一筆對條數嘅影響反而係最大。你今日報咗，下一個同你同月遞交嘅人打開呢個平台，就唔會再對住一片空白。

如果你識得行緊 Stream A 或者 Stream B 嘅朋友，將呢個平台 Send 俾佢。呢啲數字唯一會變準嘅方法，就係多啲人肯報返自己嗰筆，冇第二條路。你哋一班人一齊報，大家睇到嘅數字就即刻有用好多。

匿名、唔使登記，填你手頭上有嘅日期就得，大概一分鐘。得一個遞交日期都照收。

你自己填嘅嘢：途徑（Stream A 定 B）、遞交日期、同各個階段嘅日期（CNCC、AIP、CPP、PR Portal、eCOPR、PR Card）、簽證中心、係咪趕喺截止前遞交，同埋一段自願填、公開睇到嘅備註。

另外仲有兩樣

你個 IP 嘅雜湊值（hash），唔係 IP 本身。淨係用嚟做流量限制同粗略防重複，唔會、亦都冇辦法用嚟認返你係邊個。
你部機自己嘅瀏覽器儲存（localStorage）：你最近用嗰個 Token、你撳過加油同回報邊幾筆、圖表有冇展開、深色定淺色。呢啲淨係留喺你部機，唔會傳返上嚟。

唔會問你拎姓名、電郵、電話、UCI、護照號碼、住址等等個人資料。

但備註一欄係自由文字，而且係公開嘅。系統攔唔到你自己打自己個名或者其他認得出你嘅細節，所以唔好寫。

全部係用緊呢條路嘅人自己入嘅。冇由第度匯入，冇爬過任何討論區、Telegram 或者社交平台，亦都冇買過任何資料。冇人報，就冇數。

冇帳戶、冇登入、冇 OAuth。你提交完會攞到一個 Token，嗰個 Token 就係你嘅身分證明。

伺服器只會存 Token 嘅雜湊值，唔會存 Token 本身；而計雜湊用嗰條密鑰係放喺伺服器設定度，唔喺資料庫入面。即係話就算成個資料庫外洩，都攞唔到可以用嘅 Token。

唔見咗個 Token 就冇得復原

呢個係你要承擔嘅後果，冇帳戶就冇第二個方法證明嗰筆記錄係你嘅，只可以重新提交一筆新嘅。

數據仲少，睇個大概就得

而家記錄唔多，所以啲數字係一個粗略嘅參考，唔好當定論。人多咗自然會準啲。

呢個平台係一個香港人自己搞嘅社群項目，同 IRCC、加拿大政府或者任何政府部門冇任何關聯，亦冇獲得任何授權。呢度唔提供、亦唔可以當成移民、法律或者簽證意見。你嘅申請點處理，一切以 IRCC 同你自己嘅專業顧問為準。

呢個平台完全自費，網域、伺服器、資料庫嘅開支都係我自己出，冇收過任何資助、贊助或者商業合作，亦冇任何廣告。

有咩想問、發現數據有問題，或者想我哋刪返你嗰筆記錄，可以電郵： 852lifeboat@gmail.com